КОМЕДИЙ 12+

Премьер: 27 февраль 2025 ий.

О спектакле на русском

Пкемон Рита, Мамут Олег, Чопак Тоня, Доллар Андрей да моло ял пошкудо-влак пайремлан ямдылалтыт. Пӧртым эрыктат, мончам олтат, пачам шӱшкылыт, мелна-когыльым кӱэштыт… Икманаш, чыланат йолӱмбак шогалыныт, куржталыт веле. Кузе уке гын. Вет ял пайремыш тыште  шочын-кушшо, вара илыш пиалым ӧрдыжкӧ кычал кайыше-влакымат ӱжыныт. Нуным пукшаш-йӱкташ, малтен колташ кӱлеш…

Тиде жапыштак Металлист Йыван  йӱдым йышт ял гыч лектын каяш тарванен. Тудым, чемоданым нумал ошкылшым, казажым кычал лекше Чопак Тоня ужын шуктен да … «арестоваен». Оҥай, оҥай!  Молан вара, кӧ деч  шылын куржнеже улмаш тиде марий? Тале гармонист, баянист, гитарист йыр ӱдыр-шамыч жапыштыже мӱкшигыла пӧрдыныт. Тудын мурымжым колышташ, маныт, кумло меҥге кокла гыч толыныт. А таче ни ешыже, ни шочшыжо…

Но пашаже тушто шол: кеч ял гыч лектын чошо, кеч йӱштӧ нӧрепыш пурен шич — шке дечет шке нигуш от шыл. Эртышымат кагазысе сӱрет семын ӱштыл шуаш ок лий, мо лиймыже чылажат чонышто да ушышто ӱмырлан возалт кодын.

А ӧрдыжтӧ илен коштшо умыла: шочмо вер деч шергыже кугу тӱняште нимат уке.