М.Шкетан лӱмеш Марий драме театрын художественный вуйлатышыже, Марий Эл Республикын калык артистше Роман Алексеевлан - 50 ий! Актер ден режиссерын полышкалышын эргышт изинек театрысе кулис шеҥгелне кушкын. Тушто южшат весе: грим дене ӱпша, чыланат ала-мо тугайым, лийын кертдымашым вучат. Ныл ий М.Щепкин лӱмеш театр училищыште тунеммеке, кидышке драматический актерын дипломжым кучыктен, тудым ынде кугорныш ужатеныт.

Но тиде тӱҥалтыш веле лийын. Пеш вашке тудо рампе тулын вес могырышкыжо тошкалын – режиссурыш куснен. Б.Щукин лӱмеш театр училищын режиссер отделенийжым тунемын пытарымек, коло ий жапыште шуко чапле спектакльым сценыш луктын.

Таче тудо театрыште усталык пашалан вуйын шогышо тӱҥ айдеме. Шочынак лидер улмыжо шке йырже уста коллективым чумыраш полшен. Да ты коллектив ынде Тӱнямбал да Россий кӱкшытан фестивальлаште шке вийжым терга.

50 ий – тиде шкешотан тошкалтыш. 24 октябрьыште ме ончышо-влакым тудын ойыртемалтше усталык касышкыже вучена. Тиде поро да чонло вашлиймаш лиеш. Юбилей шкеже каласкала, спектакль гыч сцене-влакым модын ончыктат, муро йоҥгат, шарнымаш-влак иланат.

Ты кас гоч лӱмгече оза изи йочалан усталык шӱлышым пуэн, тудым вияҥдаш йӧным ыштыше ача-аважлан, туныктышо да педагог, пашам пырля ыштыше йолташыже-влаклан кугу таум ышташ палемда.

Пайрем кастене ончышым тыглай иктешлымаш огыл, а чон почын мутланымаш вуча: илыш нерген, театр нерген, искусствын вийже нерген.

Ушныза теат тушко.